แกงผักหวานใส่ไข่มดแดง กะเป็นอาหารชั้นยอดของชาวอีสานเฮา ซึ่งกะสิหากินได้เป็นบางฤดูกาลเท่านั่น ถ้าผู้ได๋ได้กินแล้วสิติดอกติดใจ โดยเฉพาะผักหวานยอดอ่อนๆสดๆ กับไข่มดแดงใหม่ๆ การเฮ็ด แกงผักหวานใส่ไข่มดแดง เฮ็ดบ่ยาก บ่มีอีหยังซับซ้อน เพราะบ่ว่าสิเป็นผักหวาน หรือไข่มดแดง มันมีความแซบอยู่ในโตของมันอยู่แล้ว ไข่มดแดงบ่ต้องใส่อีหยังมันกะแซบของมันอยู่แล้ว ฉะนั้นเมื่อนำของแซบมาแกงใส่ของแซบ ลองเบิ่งมันสิแซบยกกำลังสองหรือไม่ หรือบางครั้งเฮากะเพิ่มคุณค่าทางอาหาร โดยการใส่ ปลาย่าง ใส่เห็ดเฟียง หรือเห็ดขอนขาวอ่อนๆ เป็นแกงรวมๆนี่กะสุดยอด ส่วนประกอบ 1.ผักหวาน(ผักหวานป่า) ยอดอ่อนๆสดๆ จักสองสามกำ กำมือใหญ่ๆ บ้านเฮาเอิ้น กำง่าง 2.ไข่มดแดง อันนี่ต้องไปแหย่นำกกโก กกหว้า หรือกกม่วงกะได้ เอาจักครึ่งถ้วย ถ้าอยากให้มันออกรสส้มจักหน่อย กะใส่ แม่เป้ง นำ หรือใส่แม่มดแดงนำจักหน่อย แต่ถ้ามีโตดำๆ ให้เลือกออก มันขิว 3.ปลาย่าง จัก สองสามโต อาจสิเป็นปลาค่อโตใหญ่ๆย่างแล้วกะตากแห้งๆ หรือปลาดุกย่างกะแซบคือกัน แต่ว่า ถ้าเป้นปลาเนื้ออ่อนย่าง เช่น ปลากด ปลากะแยง ปลาเซียม อันนี่แฮ่งแซบสุดยอด 4.เห็ดเฟียง ไข่อ่อนๆ หรือสิเป็นเห็ดขอนขาวกะได้(เห็ดขอนขาวหรือเห็ดบด บัดใหญ่ เฒ่ามาบัดเปลี่ยนซื่อเป็น เห็ดกระด้าง จ้อย) 5.ผักอื่นๆ เช่นต้นหอม หัวผักบั่ว กระเทียม พริก ผักอี่ตู่หรือใบแมงลักนี่หละ แต่บางคนกะบ่มักใส่ผักอีตู่ เพราะผักอีตู่ มันมีกลิ่นหอม กลิ่นหอมของผักอีตู่สิไปกลบกลิ่นหอมอ่อนๆเฉพาะโตของผักหวาน แต่บางคนกะมักใส่ให่มันมีกลิ่นหอมของผักอีตู่ หรือบางคนกะใส่ผักติ้วเข้าไปนำ ให้มันออกรสหวานๆส้มๆ 6.เครื่องปรุงอื่นๆ ได้แก่ เกลือ น้ำปลา ปลาแดก ส่วนผู้ได๋บ่มักกลิ่นปลาแดกกะบ่ใส่กะได้ ใส่แต่น้ำปลากะแซบแล้ว(อย่างที่บอก ผักหวานกับไข่มดแดงมันมีความแซบในโตของมันแล้ว) วิธีปรุง 1.ค่างหม่อ (ตั้งหม้อบนเตาไฟ) ใส่น้ำจักสองสามถ้วย ทุบหัวผักบั่ว พอแตก ถิ่มลงหม้อจัก สามสี่หัว หักบักพริกใส่จักหน่อย(บักพริก บ่ต้องตำเด้อ เพราะถ้าตำใส่ มันสิเผ็ดหลาย เวลาซดฮ้อนๆ มันสิสะมัก ได้ง่าย) เติมเกลือหยอดน้ำปลาพอประมาณ 2.พอหม้อเดือด ให้บิปลาย่างเป็นต่อนๆ อย่าใส่ทั้งโต มันใหญ่โพดตักกินยาก ใส่ลงไปในหม้อ ใส่ไข่มดแดง(พร้อมแม่เป้ง ถ้ามี) ใส่เห็ดขอนขาวหรือเห็ดเฟียง (ถ้าเห็ดเฟียง ใข่ใหญ่ให้ผ่าครึ่งก่อน ถ้าใส่เหมิดเทิงไข่ ยามกินให้ระวังเพราะมันเย็นซ้า เวลากัดไข่เห็ดเฟียง น้ำแตกโป๊ะ ระวังมันสิลวกลิ้น) ต้มไปอีกจักหน่อย 3.เมื่อเห็นปลาย่างและไข่มดแดงเริ่มสุกแล้ว ให้เด็ดยอดผักหวานให้สั้นลงจักหน่อย หรือบางคนกะใส่ไปเทิงก่างมันนั่นหละ เวลากินจังค่อยฮูดกินเอา ผู้เฒ่ามักสิกินเทิงก่าง เวลาเคี้ยวสิได้กากใยอาหารหลายๆ เมื่อเด็ดแล้วกะถิ่มผักหวานลงหม้อเลย คนจักหน่อย อาจสิใส่ผักหอมผักอี่ตู่ลงไปพร้อม ถ้ามัก คนให้เข้ากัน 4.พอน้ำเดือดกะให่ซีมเบิ่ง ถ้ามันจาง กะเติมน้ำปลาลงไป หรือถ้ามันเค็มกะเติมน้ำลงไปเจือจางอีกจักหน่อย ถ้าพอดีแล้วกะยกหม้อลงหรือปิดแก๊ส อย่าต้มไว้โดน เพราะผักหวานมันสุกง่าย ถ้าต้มไว้โดน วิตามินต่างๆจะสลายตัว ขาดคุณค่าทางอาหาร ขาดรสชาติไป 5.พอเสร็จแล้ว ให้ฟ่าวตักใส่ถ้วย เอาไปกินเลย อย่าสะแกงไว้โดนมันสิเสียรสชาติ แต่กะอย่าสะฟ่าวหลายหละ ก่อนสิซดเข้าปากกะเป่าสาก่อนเด้อ มันสิลวกลิ้น
ไม่มีความคิดเห็น:
แสดงความคิดเห็น